Kato Pusako 'Pitaruah Bundo'

Nan sakapa lah diambiak urang
Nan sapinjik tingga diawak
Walau dibalun sabalun kuku
Jikok dikambang saleba alam
Walau sagadang bijo labu
Bumi jo langik ado didalam

Latiak latiak tabang ka pinang
Singgah manyasok bungo rayo
Aia satitiak dalam pinang
Sinan bamain ikan rayo

Baburu babi ka batu balang
Mandapek buluah nan jo rotan
Guru mati kitab lah hilang
Sasek kasia ditanyokan

Oi buyuang lakehlah gadang
Ka pambangkik batang tarandam
Ka paapuih malu dikaniang
Ka panunggu piutang lamo
Ka panapiak mato padang
Ka panantang matohari
Ka palawan dunia urang
Ka pandiri pusako lamo

Bilo kato lah ditanam dihati
Jalehlah sagalo rahasio alam
Jikok diajun sitamba lamo
Sabarih indak buliah ilang
Satitiak bapantang lupo

Laka jo dulang didalam lubuak
Pandan baduri malendo jalan
Aka hilang paham tatumbuak
Basarah diri kapado Tuhan

Kilek camin lah ka muko
Kilek baliuang lah ka kaki
Kilek kato lah ka hati
Tau di ombak nan basabuang
Tau di angin nan basiuik
Tau di rantiang ka malantiang
Tau di duri ka mancucuak
Tau di dahan ka mahimpok
Tau di tunggua ka manaruang

Ingek ingek sabalun kanai
Nan dibawah kok mahimpik
Gabak dihulu tando ka hujan
Cewang dilangik tando kapaneh

Manusia tahan kieh
Binantang tahan palu
Tagisia labiah bak kanai
Tasingguang labiah bak jadi

Diagak mako diagiah
Dibaliak mako dibalah
Bajalan manuju bateh
Balayia manuju pulau

Kuek rumah karano sandi
Rusak sandi rumah binaso
Kuek bangso karano budi
Rusak budi hancualah bangso

Basilek diujuang lidah
Malangkah dipangka karih
Bamain diujuang padang
Tahan dikieh kato putuih
Tau di kilek sarato bayang
Tau di gelek kato habih
Tau di ereng jo gendeng
Sarato kurenah jo bainah

Bapikia palito hati
Batanang saribu aka
Taraso lamak jan dilulua
Taraso pahik jan diluahkan

Bajalan injek injekkan langkah
Bakato paliharo lidah
Hiduik jan bak pucuak aru
Maikuik kama kareh angin
Iyokan nan di urang
Lalukan nan nan di awak

Tunjuak luruih kalingkiang bakaik
Guntianglah baju nak rang Guguak
Dijaik jan disudahkan
Bao ka kincia malah dahulu
Kok manih jan diraguak
Kok paik jan diluahkan
Bao bapikia malah dahulu

Adaik rang mudo manangguang rindu
Adaik rang tuo manangguang ragam
Kok condong jan kamari rabah
Luruih tantang barih adaik

Budi jan tajua
Paham jan tagadai
Kok kayo, kayo dek budi
Nak mulia, muliakan bahaso

Budi nan indak katinjauan
Paham nan indak kamaliangan
Iman nan tak buliah ratak
Kamudi nan tak buliah patah
Padoman nan tak buliah tagolek
Haluan nan tak buliah barubah

Sayang jo anak di lacuik
Sayang jo kampuang ditinggakan
Ujan ameh dinagari urang
Ujan batu dinagari awak
Kampuang nan jauah dibantu juo

Mati batungkek budi
Hiduik bakarilahan
Dipakai raso jo pareso
Ditimbang jo nyao badan

Nak luruih rantangkan tali
Nak tinggi tingkekkan budi
Nak aluih babaso basi
Nak elok lapangkan hati
Nak mulie tapek'i janji
Nak taguah paham dikunci
Nak kayo kuaik mancari
Nak tuah batabua budi
Nak namo tinggakan jaso
Nak pandai rajin baraja

Ka ilia jalan ka Padang
Ka mudiak jalan ka Ulak-an
Kok musuah indak dihadang
Kok basuo pantang di-ilakkan
Kalau ndak basuo dijalannyo
Namuah bapua pua dagiang
Namuah bakacau kacau darah
Tando sabana laki-laki